لاہور کے باؤلرز کی شاندار واپسی، آخری 8 اوورز میں 77 رنز کا دفاع کیا
پی ایس ایل 8 کے افتتاحی میچ میں دفاعی چیمپئن لاہور قلندرز نے سنسنی خیز مقابلے کے بعد ملتان سلطانز کو 1 رن سے شکست دے دی۔ ملتان کرکٹ اسٹیڈیم میں کھیلے جارہے پہلے میچ میں لاہور قلندرز کی جانب سے فخر زمان اور مرزا طاہر بیگ نے میچ کا آغاز کیا اور پہلی وکٹ کے لیے 61 رنز کی شراکت قائم کی۔ طاہر بیگ 26 گیندوں پر 32 رنز کی اننگز کھیلنے کے بعد پویلین لوٹے، انہیں عقیل حسین نے پویلین کی راہ دکھائی۔
وکٹ کیپر بلے باز شی ہوپ نے 17 گیندوں پر ایک چوکے اور ایک چھکے کی مدد سے 19 رنز بنائے۔ کامران غلام 15ویں اوور کی آخری گیند پر آؤٹ ہوئے، انہوں نے 3 رنز بنائے۔ رواں سیزن کی پہلی نصف سنچری بنانے والے فخر زمان بھی 16ویں اوور کی پہلی گیند پر آؤٹ ہوئے۔
فخر زمان نے 42 گیندوں پر 3 چوکوں اور 5 چھکوں کی مدد سے 66 رنز بنائے۔ حسین طلعت ایک چوکے اور ایک چھکے کی مدد سے 12 گیندوں پر 20 رنز بنا کر ٹیم کا سکور 164 رنز تک لے گئے اور احسان اللہ کی گیند پر پویلین لوٹ گئے۔
آؤٹ ہونے والے آخری بلے باز ڈیوڈ ویز تھے جنہوں نے صرف 4 گیندوں کا سامنا کیا اور 5 رنز بنائے، آخری گیند پر شاہنواز دھانی کی وکٹ حاصل کی۔ قلندرز نے مقررہ 20 اوورز میں 6 وکٹوں پر 175 رنز بنائے اور فخرزمان 66 رنز بنا کر کامیاب بلے باز رہے۔ ملتان سلطانز کی جانب سے احسان اللہ اور اسامہ میر نے 2، 2 وکٹیں حاصل کیں، عقیل حسین اور شاہنواز دھانی نے بھی ایک ایک کھلاڑی کو آؤٹ کیا۔
ملتان سلطانز کی جانب سے شان مسعود اور محمد رضوان نے اننگز کا آغاز کیا، محمد رضوان نے اپنی نصف سنچری مکمل کی۔ شان مسعود نے 30 گیندوں پر 35 رنز بنائے۔ محمد رضوان نے ذمہ دارانہ بیٹنگ جاری رکھتے ہوئے اپنی ففٹی مکمل کی اور وہ 75 رنز بنا کر شاہین شاہ آفریدی کی گیند پر بولڈ ہوگئے۔ اس سے قبل ملتان سلطانز کے کپتان محمد رضوان نے ٹاس جیت کر بولنگ کا فیصلہ کیا۔
ملتان سلطانز کی ٹیم میں محمد رضوان کے علاوہ شان مسعود، عثمان خان، ڈیوڈ ملر، کیرون پولارڈ، خوشدل شاہ، عقیل حسین، اسامہ میر، سمین گل، شاہنواز دھانی اور احسان اللہ شامل ہیں۔ لاہور قلندرز کی ٹیم کی قیادت شاہین شاہ آفریدی کر رہے ہیں جبکہ دیگر کھلاڑیوں میں فخر زمان، طاہر بیگ، شائی ہوپ، کامران غلام، حسین طلعت، سکندر رضا، لیام ڈاسن، ڈیوڈ ویل، حارث رؤف اور زمان خان شامل ہیں۔
